hosted by tripod
Tell me when this page is updated
Steypa dagsins

Steypa dagsins

 

22.4.06

Svindlbloggari

Ég ákvað að fara að dæmi Halls og set inn próf til að reyna að láta líta út fyrir að það sé eitthvað að gerast á þessari síðu ;-)
Kom nú reyndar ágætlega út úr þessu!

This Is My Life, Rated
Life: 8.3
Mind: 7.8
Body: 7.3
Spirit: 6.4
Friends/Family: 7.7
Love: 9.1
Finance: 8.8
Take the Rate My Life Quiz



Jóhanna Ósk - kl. 21:05

19.4.06

Vídjókvöld dauðans

verður í Firðinum í kvöld, þetta og þetta var sótt á pósthúsið (eða réttara sagt í Nóatún) áðan, og hugsum við okkur gott til glóðarinnar! Á meðan við glápum á þessa ágætu þætti geri ég ráð fyrir að við jöplum á páskaeggjum sem verður skolað niður með malti og appelsíni.
Þar sem mér tókst að snúa eitthvað fáránlega upp á bakið á mér á skírdag og uppskera tognað liðband í baki nærðist ég aðallega á Norgesici og Parkódíni um páskana, svo að ég á páskaeggið mitt ósnert uppi í skáp. Bjartur greyið hafði svo mikið að gera við að stjana við mig að hann komst heldur ekki í að borða sitt, svo hann getur borðað mér til samlætis.



Jóhanna Ósk - kl. 18:47

6.4.06

Á dauða mínum átti ég nú von en ekki þessu


How Will I Die Quiz

How Will I Die Quiz

You will die at the age of 108

You will die of sexual exhaustion

Find out how you will die at Quizopolis.com

Quizopolis


Gott til þess að vita að maður á eftir að hafa eitthvað við að vera í ellinni!



Jóhanna Ósk - kl. 22:31

30.3.06

Á rangri hillu?

Hef verið að velta því fyrir mér undanfarið hvort ég hefði kannski átt að verða endurskoðandi en ekki söngkona. Skattaskýrslan okkar Bjarts er ekki sú einfaldasta, alls konar verktakadót, ökutækjastyrkir og fleira skemmtilegt, og ég er búin að liggja yfir þessu í nokkra daga og hef svei mér þá bara svolítið gaman af. Það eina sem er svolítið frústrerandi er það að yfirleitt þegar ég er búin að koma mér inn í þann hlut sem ég er að pæla í í skýrslunni þá þarf sonurinn athygli og ég er svo búin að gleyma öllu saman þegar ég kem aftur að tölvunni. En ég er búin að finna lausn á þessu, geri skýrsluna bara á nóttunni, haha - hmmm, held að hann sé að vakna...



Jóhanna Ósk - kl. 00:07

15.12.05

Ég á afmæli' ´í dag...

Ég á afmæli sjálfur eins og Páll Vilhjálmsson sagði um árið - þó það sé nú lítið eftir af afmælisdeginum þá verð ég náttúrulega að deila þessu með fólki. Gestirnir eru nýfarnir úr myndarlegri afmælisveislu (bakaði og alles maður!) og ég er mörgum glæsilegum afmælisgjöfum ríkari, m.a. 3 bókum og nýrri vetrarkápu :-)



Jóhanna Ósk - kl. 22:58

10.12.05

Fallin í fertugsafmæli!

Þar kom að því að ég féll - í kókbindindinu! Ég hef ekki fengið mér kók síðan Friðrik Valur fæddist, sem eru semsagt rúmir 3 mánuðir. Mér finnst þetta vera ótrúlegur dugnaður, sérstaklega í ljósi þess að það hefur varla liðið sá dagur sem mig langaði ekki í kók - sem segir auðvitað mest um hvað þetta er stórvarasamur drykkur! Í gær var okkur svo boðið í fertugsafmæli þar sem var boðið uppá 5 tegundir af drykkjum - bjór, rauðvín og hvítvín, sem af skiljanlegum ástæðum komu ekki til greina, sódavatn sem mér þykir afspyrnu vont, og svo blessað kókið. Þannig að ef ég vildi ekki þorna algerlega upp var eina leiðin að fá sér kók, svo það sér það auðvitað hver maður að þetta var ekki mér að kenna heldur afmælisbarninu sem sá ekki til þess að það væri til eitthvað annað handa mér að drekka. Alltaf gott að geta kennt öðrum um :-)



Jóhanna Ósk - kl. 13:50

29.11.05

de Quervain

Er búin að vera með leiðindaverk í vinstri hendinni í nokkrar vikur, en hef af alkunnri leti ekki nennt að gera neitt í málinu, þrátt fyrir að þetta hafi nú þvælst nokkuð fyrir mér. Ég hef bara brúkað hægri í staðinn, ekki það sem örvhentir vilja helst, en maður lætur sig nú hafa ýmislegt frekar en að druslast til læknis. Það var ekki fyrr en móðir mín benti mér kurteislega á það að fyrst að hún, amma og bróðir minn væru öll með gigt væri kannski ekki úr vegi fyrir mig að skella mér til gigtarlæknis til að láta tékka á því hvort ég væri að slást í hópinn. Fram að þessu hafði ég nú bara haldið í bjartsýni minni að ég hefði bara rekið höndina utaní og þetta færi nú alveg að lagast - búið að vera í 4 vikur og svona, hlyti að fara að vera búið. Ég pantaði því tíma hjá lækninum, sem er svo mikið innviklaður í fjölskylduna að frænka mín er ritari hjá honum. Á meðan ég beið eftir doksa spjölluðum við frænkurnar um það hvað væri gleðilegt til þess að vita að stærstur hluti fjölskyldunnar væri ýmist með gigt eða alzheimer, nema hvorutveggja væri. Við komumst að því að ef maður fengi gigtina væri líklega best að fá alzheimerinn líka, þá myndi maður kannski gleyma gigtinni ;-)
Loks tók Herr Doktor á móti mér, og ég lýsti raunum mínum fyrir honum. Glaðnaði þá heldur betur yfir sérfræðingnum og hann hóf að pota og pikka í höndina og snúa og toga eitthvað, og sagði svo glaðbeittur: "Þú ert með dukervein!". Eins og lesendur geta gert sér í hugarlund varð ég eins og spurningamerki í framan, og gat ekkert annað sagt en hið stórgáfulega HA? Kom þá í ljós að ég reyndist ekki vera með gigt heldur sinaskeiðabólgu í þumlinum, og mun það vera kennt við svissneska lækninn de Quervain - læknirinn sagði glaður að hann sæi nú ekki nema 2-3 tilfelli af þessu á ári, hlýtur að vera í miklu uppáhaldi hjá honum fyrst hann gladdist svona við. Ég gladdist eðlilega líka, ekki bara að ég væri ekki með gigt, heldur hét þetta þessu líka fína nafni maður! Uppáhaldsmeðferð læknisins við þessu er að gera ekki neitt, sem mér leist nú svosem ágætlega á, nema hvað að ég hef ekki gert neitt við þessu hingað til og lítið lagast. Við sammæltumst því um að ég reyndi að halda áfram að brúka hægri fram yfir jól, og ef ekkert lagaðist myndi hann sprauta sterum á staðinn. Needless to say, þá var þetta mér mikil hvatning til að gerast rétthent næstu 3 vikur, finnst ekkert sérstaklega gaman að láta sprauta mig.



Jóhanna Ósk - kl. 15:44

23.11.05

Fleiri undarlegar netprófsniðurstöður

Which Fantasy/SciFi Character Are You?



Minnir mig nú bara á þetta




Jóhanna Ósk - kl. 19:34

22.11.05

Þetta kom nú á óvart



Viðskiptajöfur

Þú ert nýjungagjörn, yfirveguð félagsvera.
Það fyrsta sem viðskiptajöfurinn hugsaði þegar Ólafur og Dorrit trúlofuðust var hvaða áhrif það myndi hafa á gengi íslensku krónunnar. Honum finnst Donald Trump vera svalur... líka peningaklemmur. Hann ætlar, er, var eða vildi að hann hefði verið í Versló - en ekki söngleiknum.

Viðskiptajöfurinn tekur ákvarðanir með heilanum en ekki hjartanu og þarf að hugsa sig um þegar einhver spyr hann: "Peningana eða lífið!?" Hann hefur stáltaugar og getur lagt allt undir og í framtíðinni verður viðskiptajöfurinn annað hvort moldríkur - eða staurblankur.

Það er toppurinn að vera í teinóttu.

Hvaða tröll ert þú?



Jóhanna Ósk - kl. 12:59

19.11.05

Að verða foreldri

Fengum þetta í tölvupósti í dag frá Garðari Harðar, þeim ágæta frænda Bjarts á Stöðvarfirði. Gott að vita hvernig þetta verður með næsta barn ;-)

Að verða foreldri breytir öllu í lífi þínu. Foreldrahlutverkið breytist líka með hverju barni. Hér eru nokkur dæmi um hver breytingin verður frá fyrsta til þriðja barns.

Föt
1.barn: Þú ferð í óléttufötin um leið og þú ert búin að pissa á pinnann og fá tvö strik.
2.barn: Þú ert í þínum venjulegu fötum eins lengi og þú mögulega getur.
3.barn: Óléttufötin eru þín venjulegu föt.

Undirbúningur fyrir fæðingu
1.barn: Þú gerir öndunaræfingar, mjög samviskusamlega.
2.barn: Þú nennir ekki að æfa, vegna þess að þú manst að síðast gerðu öndunaræfingarnar ekkert gagn.
3.barn: Þú pantar mænudeyfingu strax á 8. mánuði.

Barnafötin
1.barn: Þú þværð öll litlu sætu fötin, straujar og brýtur saman og raðar í kommóðuna.
2.barn: Þú rennir í gegnum fatabunkann, hendir því sem er mjög blettótt og þværð restina.
3.barn: Strákar geta alveg verið í bleiku, er það ekki?

Áhyggjur
1.barn: Við fyrsta kjökur eða tíst sem heyrist úr vöggunni,rýkurðu til og tekur barnið upp.
2.barn: Þú tekur barnið upp, svo það veki ekki eldra barnið með vælinu.
3.barn: Þú kennir þriðja barninu að trekkja sjálft upp óróann yfir vöggunni.

Snuðið dettur í gólfið
1.barn: Þú tekur það upp og notar ekki aftur fyrr en þú ert búin að sjóða það rækilega.
2.barn: Þú skolar það undir næsta krana, eða bara með svolitlum ávaxtasafa úr glasi barnsins.
3.barn: Þú þurrkar það mesta af því í bolinn þinn og stingur því aftur upp í barnið.

Bleyjur
1.barn: Þú skiptir um bleyju á klukkutíma fresti, hvort sem þess er þörf eða ekki.
2.barn: Þú skiptir á 2-3 klst. fresti, ef þess þarf.
3.barn: Þú reynir að vera búin að skipta um bleyju, áður en aðrir fara að kvarta undan lyktinni, eða bleyjan dettur niður fyrir hné á barninu.

Afþreying
1.barn: Þú ferð með barnið í ungbarnasund, ungbarnanudd og barnaleikfimi.
2.barn: Þú ferð með barnið í ungbarnasund.
3.barn: Þú ferð með barnið í Kringluna og Smáralind.

Pössun
1.barn: Í fyrsta skipti sem þú ferð út, þá hringirðu heim 5 sinnum.
2.barn: Þú rétt manst eftir að skilja eftir númer þar sem hægt er að ná í þig.
3.barn: Þú segir barnfóstrunni að hringja bara ef það sést blóð.

Heima
1.barn: Þú eyðir góðum hluta dagsins í að stara á barnið.
2.barn: Þú eyðir góðum hluta dagsins í að stara á eldra barnið svo það klípi ekki eða poti í augun á nýja barninu.
3.barn: Þú eyðir góðum hluta dagsins í að fela þig fyrir börnunum.



Jóhanna Ósk - kl. 19:46

14.11.05

Hrosshár í strengjum og holað innan tré

Í einhverju bríaríi hef ég tekið að mér að spila á fiðlu á aðventukvöldi í Bessastaðakirkju næstkomandi 1. í aðventu. Það væri nú svosem í lagi ef að fiðlan mín væri ekki mesta gargan og varla hægt að bjóða fólki uppá að hlusta á hljóðin sem ég fæ útúr henni. Ég gæti svosem kannski spilað þetta á víóluna mína (sem er MIKLU betra hljóðfæri), en þá þarf ég að fara að æfa mig og því nenni ég nú ekki ;-)
Þannig að ég spyr: Býr einhver lesandi svo vel að eiga sæmilega fiðlu sem er ekki verið að brúka sunnudaginn 27. nóvember næstkomandi? Best væri náttúrulega ef ég gæti fengið stykkið lánað frá og með þessari viku til að hrella ekki líftóruna úr kórnum sem ég spila með á æfingunum! Ef einhvern langar til að lána mér fiðluna sína endilega hafið samband!



Jóhanna Ósk - kl. 18:53

28.10.05

Rok og meira rok

Það á ekki af manni að ganga í rokinu. Við Friðrik Valur fórum að skúra í Tónmenntaskólanum áðan, og vildi ekki betur til en að sólskyggnið (sem maður spyr sig hvað ég hafi verið að gera með að hafa á stólnum í þessu veðri!) sem er á bílstólnum hans fauk af og hélt á vit frelsisins áleiðis upp Frakkastíginn. Hefði ég ekki verið með barnið í höndunum hefði ég líklega skokkað á eftir því, en ef ég hefði ekki verið með barnið í höndunum hefði ég náttúrulega ekki verið með neinn stól með sólskyggni svo að þetta eru einstaklega ógáfulegar hugleiðingar...
Þar sem við erum með stólinn í láni frá systur hans Bjarts var þetta auðvitað afskaplega leiðinlegur atburður svo að þegar við vorum búin í skúringunum ákvað ég (í miklu bjartsýniskasti) að rúnta um nágrennið til að leita að skyggninu. Og viti menn, eftir 15 mínútna leit fann ég það liggjandi í snjóskafli inni í porti á téðum Frakkastíg! Urðu þar miklir fagnaðarfundir eins og nærri má geta.
Þegar við komum heim tók nú ekki betra við, þar sem að regnyfirbreiðslan var fokin af vagninum hans (sem við erum líka með í láni!) þar sem hann stendur hérna fyrir neðan tröppurnar! Ég ákvað að láta bara vera að hlaupa um allan Hafnarfjörð í leit að henni, sérstaklega í ljósi þess að það er mun minna mál að nálgast nýja regnyfirbreiðslu en að fá nýtt sólskyggni á stólinn. Fyrir utan það að yfirbreiðslan var rifin þannig að Eva systir verður bara fegin að fá nýja (eða ég vona það!).



Jóhanna Ósk - kl. 16:22

22.10.05

Skírnarmyndir

Það eru loksins komnar myndir frá skírninni á myndasíðuna!



Jóhanna Ósk - kl. 17:43

17.10.05

Kynjamunur

Alveg finnst mér eitt merkilegt. Ég hef síðustu mánuðina verið að vinna við skúringar í Tónmenntaskólanum (fín vinna!) og hef rekið mig á eitt sem mér finnst dálítið fyndið. Í sal skólans eru haldnar hljómsveitaræfingar á kvöldin, ýmist fyrir strengja- eða blásarasveitir. Eftir strengjasveitaræfingarnar, þar sem er mikill meirihluti stelpur, er krítartaflan í salnum alltaf útkrotuð af "Katrín best" og "Sigga + Júlli" og álíka hlutum, og svo náttúrulega krítarryk út um allt, skúringakonunni til mikillar ánægju - eða þannig. Eftir blásarasveitaræfingarnar, þar sem er meirihlutinn strákar, heyrir hins vegar til undantekninga ef einhver hefur komið nálægt töflunni.



Jóhanna Ósk - kl. 12:59

13.10.05

Ný síða

Friðrik Valur er kominn með eigin síðu þar sem við munum (vonandi) skrifa um það sem á daga hans drífur. Aldrei að vita samt nema að eitthvað um hann villist nú inn á síður foreldranna samt sem áður. Síðan hans er http://fridrikvalur.blogspot.com/ , endilega lítið þangað inn og lesið allt um sætasta og gáfaðasta barn í heimi ;-)



Jóhanna Ósk - kl. 21:12

10.10.05

Búin að skíra!

Þá hefur drengurinn fengið nafn, hann var skírður Friðrik Valur í Bessastaðakirkju í gær. Sr. Þórhildur Ólafs sá um að skíra, en foreldrarnir gátu auðvitað ekki annað en látið á sér bera (gekk auðvitað ekki að drengurinn fengi alla athyglina) og spiluðu bæði forspil og eftirspil. Sálmar voru hins vegar sungnir undirleikslaust og í röddum af kirkjugestum, og var vel tekið undir af báðum fjölskyldum :-) Veisla var svo haldin fyrir allt slektið heima hjá mömmu og pabba og voru veitingar síður en svo af skornum skammti, enda eru afgangar miklir, þannig að nú er lag að koma í heimsókn og fá sér tertur!
Svo ég svari spurningunni áður en einhver kemur með hana í kommentakerfinu (vorum spurð svo oft að þessu í gær) þá er Friðriksnafnið út í loftið, en flestir geta nú líklega fundið út hvaðan Valsnafnið kemur.



Jóhanna Ósk - kl. 15:57

5.10.05

Nafngift og annar bakstur

Það er mikið að gerast á heimilinu þessa dagana, enda stendur mikið til, minnsti maður verður skírður á sunnudaginn kemur. Við ákváðum að drífa í því, þar sem nafnið var ákveðið mjög fljótlega eftir að hann fæddist og við vorum farin að hafa miklar áhyggjur af því að kjafta því af okkur! Bjartur er þessa stundina að baka ostaköku, en ég sit við tölvuna og lít eftir litlum manni sem hefur verið dulítið órólegur í kvöld, eitthvað magabras á greyinu. Annars er hann voðalega góður yfirleitt, vaknar bara kl. 3 á nóttunni til að drekka, og svo aftur kl. 7, sem mér finnst reyndar líka vera mið nótt, en telst víst ekki vera það þegar smábörn eru annars vegar...
Held ég ætti reyndar að fara að gera það sem ég á að vera að gera, sem er að búa til prógramm fyrir skírnina, maður getur nú ekki verið þekktur fyrir að láta fólk sitja í kirkjunni vitandi ekki neitt í sinn haus um hvað er að gerast ;-)



Jóhanna Ósk - kl. 23:44

23.9.05

Af foreldrum

Ég hef nú verið löt við bloggið undanfarið, kannski ekki síst vegna þess að mér dettur ekki neitt í hug að blogga um nema barnið, en hef lúmskan grun um að það hafi nú kannski ekki allir jafn gaman af því að lesa það og ég hef af skriftunum. En ég hef ákveðið að gefa skít í það og skrifa bara um hann samt, hehe. Geri nú samt ráð fyrir að fljótlega komum við okkur upp sér síðu fyrir hann, og þá geti áhugasamir bara farið þangað og lesið, en hinir haldið áfram að lesa gáfuleg og hnyttin skrif mín á þessari síðu - þ.e. ef mér dettur eitthvað þesslegt í hug. Hef á tilfinningunni að ég eigi aldrei eftir að segja neitt af viti aftur - þ.e. hafi ég einhverntímann getað sagt eitthvað af viti...
Litli maðurinn stækkar og stækkar, enda tekur hann mjög hraustlega til matar síns svo ekki sé meira sagt. Við bíðum spennt eftir því að sjá hvort hann á eftir að fá holdarfar móður sinnar, sem mér skilst að hafi vakið mikla athygli á hennar fyrstu árum, og það jafnvel út fyrir landsteinana.
Hann hefur líka gert víðreist, er búinn að fara þrisvar á foreldramorgun í Áskirkju, á fjórar kóræfingar í sömu kirkju, eina æfingu í Breiðholtskirkju og í heimsókn til ömmu Ásdísar í vinnuna og til afa og ömmu í Leiðhamra. Ekki illa af sér vikið af þriggja vikna gaur!
Ég er hins vegar óðum að jafna mig eftir átökin, er meira að segja búin að syngja í einni jarðarför, og er svo að syngja einsöng í Petite Messe Solennelle eftir Rossini á laugardaginn - eitthvað verður maður að hafa fyrir stafni ;-)

Og svona að lokum - erum búin að bæta við myndum á http://www.flickr.com/photos/selvogsgata



Jóhanna Ósk - kl. 11:14

9.9.05

Nýjustu fréttir

Þá er allt að komast upp í rútínu hérna í Hafnarfirðinum. Já, eða svona... Drengurinn er náttúrulega eins og ljós, sefur bara vel á nóttunni og rumskar rétt á 3-4 tíma fresti til að fá sér smá sjúss. Hann vakir svo meira á daginn, sem er ekkert nema gott mál. Vonandi er þetta ávísun á það sem koma skal, en ekki það að hann sé bara að stríða okkur með að vera svona góður til að byrja með...
Hann er meira að segja búinn að fara aðeins út, við fórum með hann í 5 daga skoðun á mánudaginn, og barnið hafði þyngst um 150 gr., sem okkur skilst að sé mjög gott, þar sem börn léttast víst alltaf fyrstu dagana og þykir gott ef þau eru komin aftur í fæðingarþyngd í skoðuninni. Við vorum auðvitað ægilega montin af þessu, hvað annað!
Í gær fórum við Snúður (ætli hann mætti heita það?) svo á foreldramorgun í Áskirkju! Þannig er mál með vexti að ég er orðin annar af umsjónarmönnunum (konunum) með þessum morgnum í kirkjunni, og kunni nú ekki við annað en að mæta á fyrsta fundinn. Mæting var nú ekki sérlega góð, ein kona lét sjá sig, en einn er betri en enginn, og auk þess bjuggumst við nú ekki við miklu svona fyrst, þar sem það hefur ekki verið neitt svona starf í gangi þarna í 2 ár. Lillimann svaf bara í vagninum sínum (INNI!) á meðan mamma hans kjaftaði, var nú ágætt að komast aðeins út fyrir hússins dyr, og syninum virtist vera slétt sama hvar hann var, svo fremi sem hann fékk að drekka og sofa í friði.
Á morgun er honum svo boðið í mat í tilefni þrítugsafmælis móðursystur hans, foreldrarnir fá náðarsamlegast að fara með, líklega vegna þess að þau eru með bílpróf og geta því komið honum á staðinn - honum var reyndar líka boðið í partý í kvöld af sama tilefni, en foreldrarnir hafa samviskusamlega kynnt sér reglur um útivistartíma barna, og bönnuðu honum að fara. Eins gott að taka þessi uppeldismál föstum tökum frá byrjun ;-)



Jóhanna Ósk - kl. 11:39

6.9.05

Þá er komið að því

Við erum búin að opna fyrir heimsóknir ef fólk vill kíkja á okkur, endilega hringja samt á undan til að panta tíma :-)



Jóhanna Ósk - kl. 16:03

Myndasíðan okkar

Vinir og vandræðamenn

Friðrik Valur
Bjartur Logi
Sverrir
Hallur
Íris & Sævar
Álfheiður
Kristín
Dísa
Hanna Sif & Rakel
Gunnar Freyr
Hófí
Hallveig
tóta víóla
Harpa Elín

Ef manni leiðist

Garfield
 Mogginn
Baggalútur
 Dilbert

Músíktengt

King'singers
Smaladrengirnir
Sinfóníuhljómsveit áhugamanna

 Sendu mér póst

 

Weblog Commenting by HaloScan.com  

 

 

 

[Powered by Blogger]